中環出更：頭箍小姐訂造矮踭鞋
好多人話女人開心買鞋唔開心又買鞋，買到一屋都係，八爪魚都夠着，但呢個情況似乎唔適合套用在即將退休嘅「頭箍小姐」財經事務及庫務局常任秘書長區璟智身上喎！戴頭箍戴足廿幾年成為標誌的區璟智，原來着鞋都一樣咁長情，卓妮日前就見佢在金鐘一間鞋店內左試右試，以為佢買鞋啦，但原來佢着開嗰對舊鞋個踭甩咗，想造番對一模一樣嘅款式。
日前中午十二點零鐘，區璟智現身金鐘海富商場一間專門幫人度身訂造嘅鞋舖，見佢喺店內周圍望，挑選咗一輪之後，就坐低喺背對門口位置開始試鞋。
補舊鞋鞋踭
不過，佢除咗試一對新鞋之外，自己仲帶咗對舊嘅白色綁帶矮踭鞋，不時比較兩對鞋嘅鞋底。唔知佢係咪因為鍾情男裝款矮踭鞋，為咗試得更準確，仲特登帶對厚身短襪，喺試鞋時換上。
區璟智逗留咗近二十分鐘，最後都係冇買到鞋，事關老闆話要造一對一模一樣嘅鞋比較困難，因為舊嗰對鞋嘅鞋模已經唔喺度喇，而重新整過又要度腳造模好花時間。唔知佢係咪驚對新鞋整得嚟都退休，諗諗吓就聽老闆建議，將對舊鞋鑲番個新踭就算。
因曾扭親腳
至於點解佢鍾意矮踭鞋？區璟智就解釋話，以前曾經扭親腳，需要一對鞋踭冇咁高嘅鞋返工，但通常街外較端莊嘅鞋款個踭都比較高，咁啱佢知道有得度身訂造，可以揀款揀色又包合腳形，就訂造咗一對，仲一着就五、六年喇！好在呢對返工鞋應該都唔使再着好長時間，頂多幾個月應該冇問題嘅！
卓妮