「世不患無法，而患無必行之法」，古人講得一啲都冇錯，呢個世界唔怕冇法，最怕惡法，冇法仲可以補救，而惡法引致嘅後果隨時好嚴重。
呢，引起社會極大爭議嘅纏擾法就係如假包換嘅惡法，呢條惡法無疾而終，咪就係因為不得人心囉。話說法律改革委員會十六年前發表報告，指社會上涉及家暴、追債、癡戀等纏擾行為日益嚴重，部分行為難以透過現行法例規管，建議港府立法禁止纏擾行為，任何人作出連串行為令另一人感到受纏擾，而嚴重程度達至會引起驚恐及困擾，即屬觸犯刑事罪行。
講就好聽喇，其實醉翁之意不在酒，當局嘅真正目的唔係禁止纏擾行為，而係針對傳媒。好簡單，如果纏擾法真係成事，唔單止影響正常嘅商業活動，傳媒正常採訪亦必定會受到干擾，日後動輒得咎，香港究竟仲要唔要新聞自由呢？唔怪得法改會嘅建議一出，即時引起社會嘩然，新聞界固然強烈反對，立法會各政黨、人權組織、部分工會及放債機構亦表示憂慮。
最離譜嘅係，上屆政府一一年正式提出諮詢文件建議立法，將纏擾行為定義進一步擴大至「集體騷擾」及「阻嚇合法活動」，結果被各界炮轟本末倒置，認為未能針對真正嘅纏擾行為，反而可能令一般嘅遊行示威被視作纏擾。喺一片反對聲中，當局知道政黨近乎零支持，法例冇可能喺立法會過關，不得不主動拆彈擱置立法，終結呢個纏擾咗香港足足十六年嘅議題。
所以話，形勢比人強。纏擾法本來已經不得人心，加上面對二○一七年特首普選以及高鐵工程延誤等爭議性議題，政治環境愈來愈惡劣，社會氣氛愈來愈偏激，弱勢政府唔敢再點火頭，想唔擱置纏擾法都唔得喇。正如有人話齋，制訂纏擾法等於同成個新聞界為敵，十年前搞唔到，依家更加冇可能搞到。
嗱，除咗纏擾法壽終正寢，另一項同樣由法改會提出、亦被新聞界形容為「惡法」嘅法定報業評議會立法，亦將會隨之胎死腹中。講起真係好笑，當局咁多年來一直絞盡腦汁打壓新聞自由，一時纏擾法，一時報業評議會立法，無所不用其極，點知最後搞到四大皆空，簡直唔衰攞嚟衰。
正所謂，識時務者為俊傑，新聞自由係香港核心價值，亦係香港得以成功嘅根基，任何人想破壞呢種核心價值，只會自取其辱嘅咋。老實講吖，今日香港問題多多，亂象叢生，港府與其挖空心思打壓新聞自由，不如諗吓點樣改善施政好過喇。呢嗱，有人就快佔領中環喇，當局諗到點樣拆彈未吖？