政情：「生命鬥士」遊香江歎中菜
沒有四肢嘅澳洲「生命鬥士」力克胡哲（Nick Vujicic）原來鍾情食中菜，尋日佢就同幾名友人一齊現身灣仔「富豪飯堂」食午飯。據悉，Nick今次喺亞洲有演講活動，途經香港時，佢就以私人性質逗留咗幾日旅遊，享受本地美食。
富豪飯堂食點心
尋日中午大約一點鐘，我哋見有一輛二十四座復康巴士停泊喺富豪飯堂門前，只見職員將一部未有載人嘅輪椅抬入大堂，隨後不久即有一輪七人車駛至，幾名男子和一名女子先後落車，而其中一名外籍男子仲抱住個人，望真啲原來就係Nick。見佢抱住Nick入到大堂之後，就將Nick放在輪椅上面，然後Nick就自行以左邊身軀操控部專用輪椅進入飯堂內。
當Nick發現記者影相時，仲好友善地展露笑容，郁動肩膀向記者打招呼！食完飯離開嗰陣，Nick身旁嘅女友人話，Nick今次只係逗留幾日，因為知道Nick想食中菜，所以就特別帶佢去食點心，翌日就會飛去新加坡繼續做演講喇。