立法會內務委員會明日就會討論籌辦前往北歐進行議會訪問活動嘅建議，小組委員會就建議喺九月十四至二十一日進行訪問，仲預計每位議員嘅開支為三萬四千元或五萬七千元，開支多少就要視乎議員選擇乘坐經濟客位或商務客位而定。代表團內會有九位議員可以得到立法會全費資助，而自費名額就有七個，肯定爭崩頭參加。
去學求同存異
咁點解議員要去到北歐咁遠外訪呢？小組委員會副主席何秀蘭就話，呢啲國家都係組織聯合政府，但民生方面都做得好好，加上香港面對政改，商界成日怕直選後勞工主義抬頭，所以可以去睇下人哋點求同存異喎。都啱嘅，立法會成日意見分歧，泛民主派內部亦都經常內訌鬼打鬼，議員去借鏡一吓或者可以學識求同存異呢！