政情：投票騷「自閹」 佔中勢雙輸

出苦肉計 谷投票數

佔中三子尋日宣布，六二二投票日會要求市民喺原有三個普選方案外，另就一條是非題表態，入圍候選是非題包括係咪贊同特首普選需符合國際標準，以及如果政府提交嘅政改方案唔符合國際標準，立法會係咪應該予以否決。佔中發起人之一陳健民更公開承諾，若果最終唔夠十萬人投票就反映佔中行動失敗，屆時佔中三子一定鞠躬道歉、退下火線。

不過，根據泛民往績，香港大學前年就特首選舉進行嘅三二三民間全民投票，講緊都有二十二萬人投票，一○年「五區公投」投票人數低極都有近五十八萬人，根本要湊夠十萬人投票係「濕濕碎」，所以今次佢哋開出十萬人投票嘅下限，等於大大降低門檻，等自己搵到下台階，而所謂嘅鞠躬道歉，都係借苦肉計谷高投票數嘅戲碼。

至於佢哋「僭建」嘅「阿媽係女人」是非題，講到尾都係為咗箍實唔堅持公民提名嘅選民，希望推高投票率，呢樣嘢連佔中發起人之一戴耀廷都親口承認咗。呢個第四選項，分明將當日有份投票支持公民提名方案嘅市民擺上枱，懶理佢哋民意，亦變相自我否定公民提名，率先「自閹」，令投票結果毫無殺傷力可言。

自打嘴巴 遲早收檔

有官場中人直指，佔中三子行呢條路根本自打嘴巴，所謂「符合國際標準」可以各說各話，任何提交嘅方案都總有方法證明係符合所謂嘅國際標準，即使政府都可以證明自己嘅方案符合國際標準。講到尾，隨着泛民撕裂，整場佔中運動已經淪為一場投票騷，當年話要反映港人民意嘅宏願已經名存實亡，遲早「收檔」。