中環出更：前政助楊哲安傳有意戰區選
區議會選舉將於明年底舉行，各政黨政團部署消息滿天飛，最新傳出教育局前政治助理楊哲安（Jeremy）有意參加南區區議會薄扶林選區，打算挑戰分屬泛民陣營嘅當區區議員司馬文。如果明年真係見到Jeremy披甲上陣，佢將會成為近年政治委任制度下，棄官從政嘅第一人。
對於係咪有意出戰區選，Jeremy強調一切言之尚早，但同時疑露口風話不排除會參與政治，又提及其父親、立法會前旅遊界議員楊孝華對佢影響好深，即使佢前年決定棄官從商後，仍然不忘提醒佢唔好同社會脫節。佢再三強調，現階段會先做好丈夫、父親及獵頭公司嘅工作喎。
挑戰司馬文
Jeremy對於係咪參選不置可否，據聞地區人士嘅反應就支持同反對都有，支持者理據主要係Jeremy喺南區長大，依家仲係薄扶林一帶居住，有地利優勢同司馬文一較高下。至於反對者理據係建制派喺一○年補選和一一年區選，都只係取得八百票左右，因此分析Jeremy一下子要收復失地，都未必係一件易事喎。
卓妮