中環出更：名人捐畫捐錢撐正生

學生回頭 肥亨感動

沈校長日理萬機，題字好少見，但佢謙稱係書法初哥，今次以蘇軾詩作題字，係咁易嗌價五萬元算喇，點知肥亨即時舉手競投以示支持。肥亨語帶感觸話，幾年前曾參觀正生書院，睇見班學生浪子回頭，好感動：「人誰無過，班後生仔細個行錯咗路，依家肯回頭，應該畀個機會。」

有教無類，Bernard都話支持，前晚割愛捐出媽咪嘅畫作。正生書院校長陳兆焯（Alman）喺台上爆料話，Bernard早前手術出院兩日就相約見面，齊齊度橋籌錢，搏命到極。「鞋王」鄧劍群大新抱鄧鍾春華（Yvonne）都拍心口做晚宴籌委會成員，前晚拉埋奶奶鄧朱錦韶撐場。

沈祖堯（左）捐出墨寶，馬時亨（中）即場競投，陳智思（右）亦捐出媽咪畫作為正生書院籌款。（葉華英攝）	鄧鍾春華（左）與好友林柏希（中）齊擔任晚宴籌委會成員，搵來大家樂集團主席陳裕光太太羅寶靈（右）撐場。	周潤發冇出席晚宴，但捐出一幅鉑金塗相拍賣，叫價四百萬元。

Yvonne支持正生，原來佢同Alman係兒時玩伴，細個經常圍埋玩拍公仔紙，但兩人長大後各有發展，幾十年冇聯絡，直至近日為籌備晚宴再次重遇，難怪Alman笑言前晚餐飯係「神迹」喎。卓妮同場仲見到中華國術（香港）總會會長王嘉恩（Albert），原來佢近日痛風症發作，但仍帶病出席支持：「我同Alman都係十大傑青，當然要撐啦！」

卓妮