唔通真係衰開有條路？繼多個鐵路工程出現延誤之後，其他大型基建亦相繼面臨滯後危機，就好似癌細胞咁不斷擴散，問你怕未！
呢，運輸及房屋局日前承認，興建中嘅港珠澳大橋包括香港口岸等相關工程、中環灣仔繞道及東區走廊連接路工程，由於工程龐大，施工階段不時遇到各種困難及挑戰，個別工序難免會出現滯後情況喎。當局話就話會致力維持原定通車嘅目標，但究竟有冇人信呢？高鐵醜聞曝光之前，當局夠實牙實齒話工程唔會延誤喇，結果咪又係自打嘴巴。一句講晒，信佢一成，雙目失明！
好明顯，當局今次打定預防針，無非為咗日後卸責啫。其實，工程無一不延誤，乜嘢原因都係假，當局監督不力至係真，官僚想卸責喎，問過市民先喇。正如有立法會議員話齋，港府以唧牙膏方式交代各項工程進度，除咗欠透明度，亦反映當局監督工程不力。
講到監督不力，最離譜就係鐵路項目，港鐵目前進行緊嘅高鐵、南港島線、西港島線、沙中線及觀塘延線五項工程，幾乎全部延誤，淪為無底深潭。高鐵醜聞唔使講，大家已經知道晒；而沙中線就因為受阻於考古，亦唔知要搞到幾時；依家連金鐘至海怡半島嘅南港島線東段亦出現工程滯後，通車日期可能延遲一年；至於連接油麻地至黃埔嘅觀塘延線，原定明年通車，惟至上月底僅完成不足六成工程，當局不得不承認個別工程進度「有相當的滯後」；西港島線相對比較順利，整體工程已完成九成，但港鐵承認部分出入口及連接通道工程出現滯後，原定年內通車，到時可能無法同步開放。
係人都知，工程延誤一定會導致成本上升，家陣大型基建幾乎全部滯後，你話條數點計先？就以西九文化區為例，工程一拖再拖，成本一升再升，簡直係一隻超級大白象。淨係一個地庫咋，政府舊年估計造價一百億元，而最新估計竟然暴增至二百三十億元，搞到要採取斬件嘅方式，未來幾年先向立法會申請撥款合共約一百億元，然後靠提早出售辦公室及住宅地皮套現。有人寄望賣地賣得好價錢，彌補地庫高昂建築費喎，講係咁講，但事實係咪咁理想，仲要睇過至知。
正所謂，一葉知秋，港府管治混亂，敷衍塞責，搞到香港七國咁亂，基建唔延誤至奇。雖然話庫房大把錢啫，但咁搞法識印銀紙都唔掂，終須有日褲穿窿嘅咋。最無辜始終都係納稅人，無底深潭又好，大白象又好，最後都係由佢哋埋單。官僚無能，真係害人害物！