政情：公民講場：政助百里相陪 蘇冷落副局

商務及經濟發展局副局長梁敬國（Godfrey）自從被發現喺立法會冇人識佢，連主席曾鈺成都唔知佢係乜水後，簡直係政壇年度笑話。呢件事又好難怪其他人，成班高官個個守身如玉唔落區，除咗無助提高知名度外，仲被「小八國聯軍」（八位外國駐港總領事）代勞落區做騷囉！至於今次老貓燒鬚嘅曾鈺成，尋日都連忙向Godfrey道歉補鑊，解釋自己睇錯出席官員名單喎。不過，有官場中人話，最錯唔係曾鈺成，而係蘇錦樑至啱，事關每逢有飲飲食食或出風頭活動，佢就帶埋政治助理陳百里去威，上立法會回應質詢呢啲難啃嘢，就交畀Godfrey，莫非真係好似傳聞所講，蘇錦樑驚個副局長會搶咗佢個位？