唔知大家有冇察覺，最近零售業大商家好似集體潛咗水，好少出嚟為中港矛盾發聲勸交？我哋收到風，受惠於旅遊業嘅一班商界老闆私底下傾過偈，決定唔再好似以前咁公開發聲。因為香港愈來愈多激進分子，佢哋對勸交嘅聲音都聽唔入耳，商界老闆驚講咗唔啱聽嘅說話，容乜易惹來網民圍攻店舖，影響生意。所以大家已有默契，日後若想發表意見，寧願透過商會或團體名義，或直接向政府反映，費事招口舌是非，所以齊齊玩失聲。
講起最近中港網民爭論激烈嘅內地小童當街便便事件，凸顯咗旅客喺香港人生路不熟，急起上嚟唔知去邊度搵廁所嘅問題。
有商界老闆認為，政府應該承擔起「廁所責任」，最好係喺政府佔大股嘅港鐵沿線做到站站有廁所，咁樣香港市民都得益。對於餐廳食肆通常喺門口張貼「廁所不外借」嘅字眼，商界認為情有可原，事關若借廁所嘅客人期間有咩閃失，餐廳仲要負起保險責任，所以若將提供公廁嘅責任推畀商界，唔係咁公平喎！