新民黨同沙田地區政團公民力量（公記）結盟後，帶出其中一個最明顯嘅訊息，就係新民黨想進一步擴闊版圖，於二○一六年立法會直選時在新界東多取一席，但究竟由誰人參選就依然眾說紛紜。有人話，考慮到公記區味太濃，冇明星級議員，要喺立法會爭一席位有難度，所以可能由新民黨空降人選落區。但又有人話，不如搵番已加入公記嘅工業界立法會議員林大輝，及上屆曾代表公記出選落敗嘅沙田區議員龐愛蘭出征。
盼新民黨平等共處
最新消息話，其實公記最希望將呢個機會留番畀佢哋啲青年成員，因為咁先算係真正嘅結盟，大家以後先可以平等共處咁話。換句話講，即係大輝同龐愛蘭都未必有機會出戰。
其實公記確有唔少地區經驗豐富嘅青年軍，包括沙田區議員林松茵、陳敏娟、梁家輝及姚嘉俊等，之不過除咗沙田區居民認識佢哋之外，走出沙田區就冇咩人知嘞。
所以公記如果真係想派自己人出選，就要加把勁，力捧一、兩個明星成員出嚟至得，最低限度活動範圍唔好只係局限在沙田區囉！