政情：醫局「布」仇 大炒立會隊
立法會經過十日「拉布」戰，前日終於審議完《財政預算案》六項合併辯論，並開始就一千一百多項修訂進行表決。雖然政府機關運作似乎未受太大影響，但部分機構已須於下月開始動用儲備，其中醫院管理局（醫管局）就係其中一個受害者。咁啱醫管局尋日同立法會足球隊踢咗場足球友誼賽，仲大炒班議員四比一添！莫非醫管局因為財政受立法會「拉布」議員拖累，所以懷恨在心，要喺球場上報仇？
梁國雄未踢先「淆底」
話說立法會足球隊尋日約咗醫管局精選嘅足球隊踢咗場友誼波，立法會足球隊方面有隊長陳克勤、議員郭偉強、梁志祥、醫學界嘅梁家騮（怪醫）及早前踢波整親腳後首次復出嘅「拉布」議員梁國雄（長毛）等。至於醫管局方面，除咗有局方職員，當然唔少得醫管局行政總裁梁栢賢（PY）啦！雙方喺比賽開始前，循例咁互換錦旗，再影張大合照，就喺呢個時候，長毛就疑似「淆底」不斷話：「友誼第一呀，唔好太茅！」PY就話：「毛哥十六號，大家認住佢喇！」聽到呢啲說話，大家都知咩事啦！
到比賽開始時，唔知怪醫係咪為免被立法會同事指佢係內奸，落場僅十分鐘就唔踢，但就算佢有份踢，醫管局都係住立法會係咁砌，頭嗰十幾分鐘就輕鬆入咗兩球，班議員就算換晒啲立法會保安同外援落場都攻唔入、亦守唔住。到下半場，議員似乎熱過身，識得反擊，但依然不敵醫管局嘅精英隊後衞，幾經辛苦先攻入一球，但唔使二十分鐘，再畀醫管局入多兩球，所以立法會隊最後以一比四輸咗場比賽。
克勤喺賽後話，可能係大家因為「拉布」搞到太攰，加上天氣焗熱，所以不在狀態喎。而郭偉強就同長毛講，不如以後用「拉布」嘅時間練波。其實喺比賽期間，長毛將「拉布」絕技轉化為拉衫，仲拉跌人添，搞到醫管局攞到射罰球機會。
梁栢賢話「切磋球技」
至於醫局贏咁多球，係咪為報仇先？PY就話友誼至上，大家切磋球技啫，唔存在報仇。不過PY就笑稱，佢哋平時喺立會較被動，議員主動啲，但喺球場上喇喎，佢哋就可以主動好多喇！