根據聖經嘅預言，當世界末日臨近，世局將會動盪不安，民攻打民，國攻打國，多處必有饑荒、地震。正所謂，好嘅唔靈醜嘅靈，當今世局動盪，七國咁亂，雖然國攻打國嘅情況仲未發生，不過民攻打民嘅亂象就屢見不鮮，唔係騷亂，就係政變，唔通世界末日嘅預言真係噩夢成真？
即係咁，越南反華暴亂風波未息，新疆又發生恐怖襲擊，而泰國更加出現政變添，周邊地區烽煙四起，都咪話唔得人驚。呢，泰國軍方突然宣布接管政府，帶走多名政治人物，軍方高層呼籲國民保持冷靜，強調政府會正常運作喎。講係咁講啫，政局丕變，社會動盪，叫人點冷靜吖，軍方日前實施全國戒嚴，夠話唔係政變喇，家陣咪又係另一回事。所謂君子不立危牆之下，鑑於越南局勢不明朗，旅遊業議會決定取消所有越南旅行團，依家輪到泰國出事，旅行團照舊出發係咪適當呢？
功夫茶咁問唔係冇原因，幾年前泰國發生政治動亂，國際機場被示威者包圍，各地政府紛紛出動包機接載滯留當地嘅國民，點知港府掉以輕心，反應遲鈍，以致滯留當地嘅港人淪為國際孤兒，有港人甚至不幸魂斷異鄉。所以話，泰國局勢立立亂，港人固然要識得執生，港府更加要醒醒定定，千祈唔好又累街坊吖！
講起真係令人唏噓，泰國本來係魚米之鄉，民風淳樸，經濟發展有聲有色，可惜近年政治鬥爭不絕，政局動盪不安，搞到國際形象及經濟飽受打擊。唔使講其他，淨係講執政者同反對派嘅角力，已經令人不勝其煩，一時黃衫軍，一時紅衫軍，一時圍堵政府，一時包圍機場，罷工罷課沒完沒了，示威遊行無日無之，成個曼谷好似戰場咁，社會點可能平靜，經濟點可能發展，人民點可能安居樂業吖。
有人問，今日嘅泰國，會唔會就係明日嘅香港呢？唔係杞人憂天，香港愈來愈政治化，一樣七國咁亂，議員喺立法會玩拉布，政客喺街頭搞佔領，成個社會陷入政治泥沼不能自拔，遲早爆大鑊嘅咋。尤其今年係政改年，佔領中環一觸即發，政治風暴隨時殺到，唔驚就假。
講開又講，民主唔係唔好，但如果搞到好似泰國咁，就算一人一票都冇用喇。有人話喎，冇民主就冇民生，有咗普選就可以解決香港嘅政治困局，講到好似萬應靈丹咁，你信唔信吖？
一句講晒，世界局勢亂紛紛，港人更加要自求多福。你知喇，香港近年經濟不振，民生凋敝，競爭力好似食咗瀉藥咁，一跌再跌，如果繼續吵吵鬧鬧，內鬥內耗，就算世界末日未來臨，香港都先沉淪喇，係咪！