我哋早前寫過，過往每年六四前夕都會搞絕食嘅學聯，因不滿泛民政黨早前又跟風絕食搞到cheap晒，決定今年唔再絕食，改用其他較新穎同出位嘅手法悼念六四。
最近佢哋終於度到橋，建議喺今年六月一日參加完支聯會舉辦嘅愛國民主遊行，再聯同學民思潮一齊操去西環，向中聯辦掟紅色水彈同陰司紙等，盼做到「血染中聯辦」效果。
學聯同學民思潮又有意參照早前反高鐵示威嗰隻巨型大白象，製作一架或多架巨型紙製坦克車，喺六月二日至三日操去政府總部、甚至解放軍駐港部隊總部示威。至於支聯會一年一度喺維園舉行嘅六四燭光晚會，學民思潮同學聯都會有代表上台，暫時冇計劃喺集會前後搞其他嘢，以免又被人話佢哋抽水或搞亂檔喎。
不過，學民思潮在泛民政改公民提名方案上佔盡上風，玩到班泛民老鬼陀陀擰，進退失據，今年學民思潮與學聯以高姿態參與六四燭光晚會，到時會否連支聯會地位都佔據埋呢？