政情：人人做中產？ KK話瑞士工會太進取
瑞士最大工會SGB早前提出要將最低工資訂為每小時二十二瑞士法郎，即相等於港幣一百九十元，由全民公投決定是否支持建議。工聯會立法會議員黃國健（KK）話唔覺得當地工會「獅子開大口」，但就略嫌工會過分進取，因為咁計一個月就會有成三萬多元，人人都可以過中產生活，聽落有啲超現實。
當地物價太高
雖然建議最後被大比數國民否決，但KK解釋，將最低工資訂得太高並唔係工會嘅錯，而係因為當地物價太高，先至令勞工界要出此對策。佢又透露，喺七至八年前代表勞工顧問委員會去瑞士日內瓦開會時，已經深深感受到當地高物價嘅威力。當時唔少勞工界前輩建議佢唔好入住日內瓦市內酒店，反而走去隔籬嘅法國租酒店住，再喺每朝搭廿五分鐘巴士去日內瓦開會，晏晝就食麵包算，慳得一元得一元。
去到當地旅行都少不免要買手信，但KK話當時冇乜買到手信，反而買咗幾把瑞士軍刀，因瑞士軍刀喺日內瓦好平，分分鐘平過香港。