政情：戴耀廷搬龍門氹人投票

佔中商討日選出三個政改方案，包括學界方案、人民力量方案、真普選聯盟（真普聯）「三軌方案」，共通點係都有公民提名元素，泛民多個冇份入圍嘅方案都酸溜溜，搞到分裂成撐公民提名同唔撐公民提名兩派，其中民主黨（白鴿黨）更因人民力量同社民連冇支持真普聯方案，決定下月全民電子公投後不再出席真普聯會議。有泛民成員更預告，當日唔會投票，令到泛民嚴重分裂，佔中搞手對此也感到始料不及。

提普及平等「阿媽係女人」

就喺呢個進退為谷嘅局面，「搞事四人幫」又再搞風搞雨，有成員先後開腔呼籲市民投票，難免令人懷疑有人開始喺背後操盤發功。據聞連一直死撐要跟機制辦事嘅佔中核心人士，唔知係咪礙於形勢比人強，都有跪低迹象，臨時提出「搬龍門」方案，就係加入新投票選項，聽聞選項係關乎特首普選原則，如無篩選、普及而平等、符合國際標準等「阿媽係女人」嘅內容，希望令到唔認同篩選、公民提名嘅泛民支持者回心轉意，谷高投票率，才可增加政治能量向中央施壓。

據知佔中核心人士數日前已將有關構思知會學聯、學民思潮等受影響團體，最快於下周二會再向有份參加商討日嘅機構交代確認以上訊息。不過，佔中核心人士今次臨時加插新方案，等同「掛羊頭賣狗肉」或買豬肉搭豬頭骨，會否因討好某一部分人，變相又激起泛民內部進一步矛盾或內鬥，到時就真係得不償失嘞！