中環出更：監警會報告 撐朱敏健言論
小學教師林慧思去年爆粗辱警引起軒然大波，退休警司劉達強等多名退休及休班警員參加旺角行人專區撐警方集會，獨立監察警方處理投訴委員會（監警會）秘書長朱敏健將集會定性為「政治性質」，直指休班警員出席有可能違規。監警會事後合共收到六十六宗投訴，其中超過九成都係針對朱敏健嘅言論，而事隔約十個月後，監警會終於公布調查結果，力撐朱敏健當日言論係「公平、不存在偏見及具理據」。
有「自己人查自己人」之嫌
至於朱敏健被指「未審先判」嘅指控，負責跟進此事嘅專責委員會認為朱敏健再三強調，判斷有否警務人員違反警方內部守則時，需要整件事去評估，加上此事係咪恰當，較適宜係由警方管理層去判斷，因此判斷朱敏健嘅言論無「未審先判」意向或不公平和存有偏見。
不過，由於呢個調查報告係由三名監警會管理委員會委員組成嘅委員會負責，明顯有「自己人查自己人」嘅潛在衝突，更令人懷疑調查結果係咪一早寫在牆上，究竟朱敏健會否就此甩身，還看該批投訴人有否下一步行動嘞！
卓妮