立法會尋日早上舉行特首答問大會，除咗各問責局官員出席外，一眾行政會議成員都乖乖坐喺公眾席上擺陣助聲勢。不過，卓妮竟然見到有行會成員及副局長當特首冇到，不時合埋雙眼，有啲閉目養神，有啲就真係瞓覺，齊齊「瞓身」撐特首。至於坐在會議廳嘅議員亦唔多專心，好似漁農界議員何俊賢（高佬賢）就被發現上購物網，仲睇埋股市行情。另一議員「AV仁」何俊仁就病到缺席答問大會。
就公眾席現場所見，行會召集人林煥光不時閉目養神，有時又垂下頭睇手機，都唔知係咪瞓咗。另一行會成員李國章、運輸及房屋局副局長邱誠武、商務及經濟發展局副局長梁敬國、政制及內地事務局副局長劉江華都加入瞓覺行列。莫非呢班行會成員及副局長好似當年立法會議員黃宜弘咁，都係對特首施政好有信心？
席上立法會議員又點呢？高佬賢就被發現喺特首發言時，上購物網同睇股票。高佬賢就解釋話，佢只係冇閂購物網嘅網站，答問會期間完全冇睇過。至於用手機睇股票就係因為當時特首講緊樓市辣招同減辣政策，自己又唔太熟書，所以咪惡補吓囉，想睇辣招對地產股有咩影響喎。佢強調自己只持有一隻銀行股，用嚟儲錢，但絕對冇持有任何地產股，所以根本唔存在要睇實啲股票。
至於上次在政府公布財政預算案時睇o靚模艷照嘅AV仁，因為患上重感冒而缺席答問大會，佢話一日打幾百個噴嚏，食完藥太眼瞓，所以逼不得已缺席。佢仲話，自己每次病都唔去睇醫生，認為醫生開藥同自己買藥冇分別，所以食成藥「自醫」，到真係頂唔算時先求診，而今次好彩食完超級感冒藥就無事喎，咁大個人，認真兒戲。
卓妮