曾幾何時，香港作為亞洲四小龍之一，經濟成就舉世矚目，人見人愛，花見花開；可惜好景不常，隨着周邊地區迅速發展，香港優勢漸失，競爭力每況愈下，真係往事只能回味咯。
呢，瑞士洛桑國際管理學院發表今年全球競爭力報告，香港排名由舊年嘅第三跌至梗頸四，而新加坡就後來居上，連升兩級至第三位，取香港而代之。講起都幾可悲，喺呢個排名榜中，香港曾連續兩年高踞首位，傲視全球，風光一時無兩，點知時移勢易，香港舊年跌兩級，今年再跌一級，低處未算低，問你怕未。
逆水行舟，不進則退，一啲都冇講錯。日前中國社科院發表嘅《城市競爭力藍皮書》，香港話就話連續十二年排全國首位，但社科院警告香港優勢弱化，後勁不繼，遲早被內地城市後來居上。話口未完，香港競爭力全球排名又告下跌，證明社科院嘅警告唔係危言聳聽。早前有研究指出，天津經濟總值明年就會超越香港，成為繼上海及北京之後，另一個後來居上嘅城市，唔怪得有人話香港遲早淪為中國三、四流城市喇。
風水輪流轉，一個地方嘅墮落係有迹可尋。洛桑國際管理學院嘅全球競爭力報告主要根據經濟表現、政府效能、企業效能及內部經濟結構四大範疇，分析各個經濟體嘅競爭力，而香港近年幾乎樣樣都退步，排名唔跌至奇喇。係人都知，香港回歸後兜兜轉轉，一事無成，全靠內地高速發展，香港搭順風車，先至可以維持表面繁榮咋，依家隨着內地經濟增長放緩，香港隨時連順風車都冇得搭，想唔沉淪都幾難。
所以話，唔怕唔識貨，最怕貨比貨。香港係中國嘅門戶，亦係走向世界嘅橋樑，本應近水樓台先得月至啱，點知結果啱啱相反，近水樓台得個吉。反而缺乏天時地利嘅新加坡快速發展，樣樣都優勝過香港，你話究竟點解呢？答案其實好簡單，星洲政府強勢管治，政通人和，可以全心全意發展經濟，而港府就好似跛腳鴨咁，寸步難行，乜都做唔成，加上社會愈來愈政治化，根本冇人關心經濟及民生。呢嗱，立法會針對預算案嘅拉布搞到神憎鬼厭，而當局就束手無策，呢啲咪就係香港自甘墮落嘅證明囉。政府無能，政客無良，成日嘈喧巴閉，香港點可能有運行呢？最怕遲啲佔領中環正式上演，香港仲有排亂吖！
「更能消，幾番風雨，匆匆春又歸去。」辛棄疾呢幾句詞好似講緊香港咁，令人不勝唏噓。風雨摧殘，春光歸去，香港昔日輝煌已經成為過去，依家只能靠食老本過日子，唔知仲可以食幾耐呢？