本港英文報章《南華早報》又「擺烏龍」，尋日該報刊出有關已故前中共總書記趙紫陽兒子趙五軍的訪問，但該報就將趙紫陽個中文名寫成「趙志陽」。爸爸個名無喇喇被人改咗，真係唔知趙五軍有咩反應喇。其實該報已經唔止一次、兩次出錯，而係錯過好幾次，睇嚟真係錯開有條路。
《南華早報》搞錯人名都有唔少前科，早幾年曾經喺頭版報道，將前國家主席胡錦濤個中文名寫錯做內地維權人士胡佳；又試過報道恐怖分子拉登（Osama）死訊時，將Osama誤寫成「Obama」（美國總統奧巴馬），真係嚇親人。
前年該報頭版報道又再「張冠李戴」，將公民黨梁家傑評論時任港澳辦副主任張曉明嘅言論，夾硬套落基本法委員會副主任梁愛詩把口，仲連詩姐張相都出埋。該報出錯幾乎每年一鑊，究竟幾時先至知錯能改呢？