政情：搞網站借外力 高達斌被搵笨
「愛字堆」愛港之聲作為愛國愛港嘅中堅分子，理應以行動支持國貨，但主席高達斌竟自爆為製作愛港之聲官方網站，特地搵咗美國一間網頁寄存及域名註冊公司幫佢哋，點知反被對方「搵笨」，網址連結做唔到，連錢都被對方沒收。失錢事小，高達斌唔怕被人指控勾結「美帝」勢力咩？
信唔過本地公司
高達斌坦言，拒搵本地公司係擔心對方會因為政治原因，而搶先註冊佢哋想要嘅域名，所以寧願畀多幾百元都要搵美國公司幫忙。不過，高達斌不滿對方要求佢哋畀錢買增值服務，一怒之下轉公司，落咗嘅訂金都未必攞得番。咁佢地最終搵邊度嘅公司搞呢？原來係加拿大。估唔到愛字堆都有動用「外國勢力」嘅時候。
另外，往年都會趁「七一」搞嘉年華嘅愛港之聲，今年會再接再厲，仲搵嚟一架開蓬車宣傳反佔中。開蓬車計劃當日由九龍出發，幾乎行勻全港十八區，估計「碳排放」都唔少。