政情：發叔「預言」爆城鄉衝突

指原居民賣丁權「改善生活」

至於原居民售賣丁權又點呢？發叔就話，原居民冇公屋又冇居屋，只係得個丁權，着數只係起樓唔使補地價，但賣出去一樣係要補地價，賣丁權可能為咗改善家人生活，應該可以理解。佢又話，自己作為太平紳士和鄉紳，又係只得一棟三層高、每層七百呎嘅丁屋，如果身在古代，佢可能係「員外」都未定喎。

據悉，目前政府對丁權問題嘅立場，係會尊重歷史同現實，但聲言政府冇可能無止境供應土地畀「子又有子、孫又有孫」嘅原居民建屋。唔知係咪因為咁，發叔預言會喺十年內將會爆發城鄉矛盾衝突呢？不過，發叔已將近八十歲，十年內或幾年後，佢仲係咪在位指點江山實在好難講囉。

撐女婿入委會發展大嶼山

發叔預言十年內將會爆發城鄉矛盾衝突，但就冇講自己會否幫手平息呢啲紛爭，反而重申堅決反對同樣未發生嘅佔領中環行動，批評佔中是由少數極端人士提出，意圖威脅阻撓政府政改工作。對於損害社會安寧和經濟發展嘅挑釁和激進言行，鄉議局絕對不會袖手旁觀喎，仲呼籲新界全體村代表、街坊代表及鄉民，認清佔中對社會各方面造成的危害，共同反對及抵制佔中。

講到利益，發叔女婿、信和置業董事總經理余漢坤早前獲委任為大嶼山發展諮詢委員會成員，但被指於大嶼山擁數十幅土地及物業，發叔就聲言，余漢坤已作利益申報，而作為新界人，有土地好正常，亦同意委員會加入熟悉大嶼山生活嘅人士，認為可起到積極作用喎。