教育局局長吳克儉（吳得掂）日前高調批評佔領中環（佔中）行動，話佔中冇可能唔違法，而學生參與佔中，更加可能留有案底，影響之後嘅升學同就業。民政事務局局長曾德成喺六七暴動期間，喺其就讀嘅聖保羅書院內派發反港英政府單張，被指干犯煽動罪名而被判入獄兩年。德成局長尋日出席地區活動時，不惜自挖當年瘡疤幫吳得掂護航，話自己當年只係喺學校派發反殖民主義傳單，咁做「何罪之有」喎。
德成局長話，吳得掂當日提醒老師同學生要注意守法，只係想講出事實，亦係佢作為局長要履行嘅職責。佢之後又用自己做例子，話當年被捕入獄已經係幾十年前嘅往事，又話當時亦有朋友被港英政府檢控同拘捕，對佢哋嘅學業同事業造成影響。不過，德成局長出獄後仕途一帆風順，依家更加做埋局長，發展都算相當理想。被問到學生參加佔中同佢一樣都係公民抗命時，德成局長就冇正面回應，只係話老師、學生同家長都應該有獨立思考，唔好道聽塗說。