政情：何柱國爆粗 五鬧肥佬黎

《蘋果》業績差 節目為老不尊

何柱國喺酒會前同記者傾偈，透露婚禮全部開支都係佢畀，雖然唔使幾千萬元，但就豪氣咁講「依家我娶新抱，佢哋點畀啫」。點知當有《蘋果》記者問佢會唔會派利是畀星島員工，佢先答「冇計劃」，之後反問今日有冇拎利是，對方話冇要，佢就窒「冇要就唔好問」。之後有記者問佢出唔出花紅，佢就話上市公司「點派？問呢啲問題係傻嘅」，仲叫記者攞開部手機（錄音），之後就離開咗。

原來上述何柱國嘅言論只係頭盤，之後先後五次出來鬧得更狠。佢問《蘋果》記者係邊間報館，仲寸嘴話：「睇住盤數先啦，（盤數）唔係幾妥，可能聽日輪到你被人炒」，跟住就返入會場。之後佢又行番出來，鬧《蘋果》業績好差，多年來搞促銷、電視都分別蝕咗幾十億元，蝕到就嚟冇錢，「好彩冇買你哋股票，如果唔係就Ｘ街，（下次）問啲聰明啲嘅問題」，然後又再返入會場中。

何柱國意猶未盡，又返出來話《蘋果》動新聞有個節目，「有一班老嘢，加埋幾百歲，同啲o靚模講啲唔三唔四鹹濕笑話，我諗個節目應該叫《為老不尊》，睇到人反胃」，仲話要請肥佬黎食「偉哥」，「佢講過話有食呀」，跟住又行開，但回頭話會諗到再講喎。

五億誹謗官司 稱準備有戲睇

之後佢真係第四次行出來，話壹傳媒嚟緊好大鑊，「亂寫作古仔被人告，一大班人排緊隊（告）」，其中一單誹謗官司，如果輸咗就要畀五億幾元，話準備有戲睇喎，跟住又行開。

大家以為何柱國鬧夠啦，點知佢第五度出來，翻舊帳聲稱八、九年前曾搵過肥佬黎去紅館講辦報宗旨同良心，仲話如果對方唔嚟就係烏龜，結果肥佬黎都冇嚟到。原本何柱國話諗到會再出來講，但最終都冇再講喇。雖然肥佬黎係抵鬧，但辦喜事都搞到自己咁勞氣，真係得啖笑囉！