俗語話，有早知，冇乞兒。世界上冇一個水晶球可以預測未來，如果有人話你知二十幾年後會發生乜嘢事，你信唔信吖？
即係咁，喺醫管局周年研討會上，行政總裁梁栢賢話喎，預計到二○四一至四二年度，醫管局經常性開支將高達一千六百九十億元，比依家增加三點八倍，需要增加一萬八千個床位、六千二百名醫生及二萬四千名護士。
係唔係？依家只不過係二○一四年，醫管局咁快就講到二○四一年度嘅開支，會唔會早咗啲呢？冇錯，隨着人口老化，醫療需求增加，開支必定亦會增加，呢點毋須水晶球大家都知道，但依家預測二十七年後嘅醫療開支咯喎，咁就實在太神奇喇。試諗吓，財政司司長曾俊華連每年嘅財政都估到離題萬丈，愈錯愈離譜，醫管局又何德何能預測咁長遠嘅事呢？
好明顯，醫管局呢招又係靠嚇。正如鬍鬚曾聲稱政府最快七年後可能出現結構性財赤咁，根本就係「狼來了」，細路仔都唔信喇。本來呢，如果港產官僚真係有危機意識，識得未雨綢繆，為將來打算，未嘗唔係一件好事，可惜佢哋志大才疏，一味靠嚇嘅目的只係為推卸責任，同危機意識完全無關，更加睇唔到點樣未雨綢繆。
大家都知道，港府為咗推卸公共醫療責任，絞盡腦汁，花樣百出，強迫醫療保險受到抵制，轉而硬銷自願醫保。可能當局亦明白始終難過民意呢關啩，咪不斷喊「狼來了」囉，講到好似再唔推行醫療融資，醫管局隨時要關門咁滯。其實，港府醫療承擔佔公共開支比例一向唔高，歐盟國家公共醫療開支佔GDP比例達到百分之七至十，而香港僅佔約百分之三，簡直係小巫見大巫。
老實講吖，近年醫療問題多籮籮，前線人手短缺、輪候時間過長、醫療質素下降、事故無日無之……醫管局管理混亂，連眼前嘅問題都解決唔到，反而擔心二十幾年後嘅開支，你話係咪九唔搭八吖？嗱，要推行醫療融資唔係唔得，自願醫保亦未必不可行，但首先必須改革醫管局，令公立醫院服務重回正軌，咁先至可能得到民意支持，否則，硬銷自願醫保盞自討苦吃，唔衰攞嚟衰嘅咋。
講開又講，當局舊年成立所謂督導委員會，話就話要檢討醫管局管理及運作，點知到依家仲係無聲無息，睇怕又係雷聲大雨點小。無論點都好喇，人口老化危機逼近，醫療問題急需解決，當局再唔盡快整頓醫管局，理順成個醫療系統，可能好快就爆煲嘅喇，仲使等到二○四一年咩！