上星期三立法會流會收場，負責帶頭「拉布」嘅梁國雄（長毛）開腔怪責議員王國興（阿王）留喺前廳歎奶茶，先至搞到流會。對於呢個指摘，阿王事隔一周終於反擊，佢話自己對奶類產品敏感，咁多年喺立法會都冇飲過奶，何況係奶茶？
尋日立法會繼續進行「拉布」戰，正當長毛拉到忘我境界時，阿王就突然起身回應「飲奶茶事件」，批評長毛「生安白造」。阿王仲自爆一直對奶類產品敏感，一飲奶就會肚痛去廁所，所以從政多年來，未試過喺立法會掂過任何含奶嘅飲品，以免重要關頭要去廁所喎，所以流會唔關佢事。
連立法會主席都覺得呢件事太「小學雞」，即刻要求阿王終止發言。既然阿王要搵到「奶敏感」做擋箭牌，長毛都冇晒辦法，惟有認衰話阿王冇飲奶茶，可能當時只係飲緊檸茶。
其實阿王飲咩唔係重點，重點係咪佢因為飲嘢而太遲返回會議廳，成為流會幫兇。