政情：AV仁「高攀」咪兜 累人累物
立法會會議廳外長期都擺放咗個「咪兜」喺度，方便議員及官員埋去接受訪問，但對於好似「AV仁」何俊仁身材咁矮小嘅議員嚟講，好多時都要調低個「咪兜」就佢。咁啱尋日AV仁接受訪問時，個「咪兜」就遮咗佢半張臉，佢於是自行調低個「咪兜」，點知左擰右擰都搞唔掂，惟有等立法會職員來幫手。AV仁為免一碌木咁企喺度咁尷尬，就自行返入前廳等候。
攝影師幫手壓親
不過，過咗幾分鐘都未見有立法會職員出來幫手調低個「咪兜」，一位攝影師就行出來幫手，點知呢個時候成個「咪兜」跌咗落來，仲壓親攝影師個頭添，真係唔好彩喇，都唔知係咪之前AV仁擰過個「咪兜」累事。如果AV仁下次行埋「咪兜」時又係唔夠高嘅話，睇嚟都係自己擔張櫈仔方便啲，或者秘書處提供張櫈仔畀佢，咁樣唔使勞師動眾嘛。
