政情：區議員「有獎問答」硬銷自己？
區議員搞蛇齋餅糉冧街坊非新鮮事情，但答啱問卷就獲送漢堡包就較為罕見。我哋最近嘅網上見到，民主黨荃灣區議員李洪波喺區內派發傳單，指明當區居民答啱晒單張印載嘅問卷，交去佢嘅辦事處就可得到食物券換取漢堡包一個。
滿分送漢堡包
李洪波呢份問卷共有六條問題，其中四條係「四揀一」嘅選擇題，問題統統同李有關。舉例指，首條問題係李洪波早前要求遷拆區內公園嘅電訊發射器原因；第五條問題就涉及李洪波辭去教師工作當全職議員嘅原因。李洪波要居民答啱晒問卷問題先有漢堡包食，變相要居民牢記佢過去做過啲乜，硬銷自己嘅味道甚濃。