政情：局長滿天星推「一堆三爐」
立法會工務小組委員會繼上周審議政府「三堆一爐」撥款申請後，尋日繼續審議有關方案中擴建將軍澳堆填區及興建焚化爐嘅建議。不過，場外有將軍澳居民及環團抗議擴建堆填區，場內就有泛民主派議員提出近二十項動議，好似想搞小型「拉布」行動咁款，搞到環境局局長黃錦星（星星）都搞到暈陀陀、亂晒龍，將「三堆一爐」講成「一堆三爐」，十足打邊爐咁烚吓烚吓。
工務小組委員會會議上，議員范國威（Gary）聯同陳偉業（大舊）提出共十三項動議及五項臨時動議，內容主要要求政府先處理某啲環保政策後，先至擴建堆填區，當表決係咪處理呢啲動議前，Gary又向政府提出大約十條提問，所以搞到星星暈陀陀，將「三堆一爐」講成「一堆三爐」添，認真蝦碌。
居民大鬧公眾席 報警收場
至於西貢區議員方國珊（哪吒）一朝早喺會議開始前，就聯同約十名將軍澳居民於立法會外上演街頭劇，戴住有星星扮演納粹黨領袖希特拉嘅面具，話政府堅持擴建堆填區，等於納粹黨逼居民吸毒氣喎！而四大環團亦有約十名成員到場，話政府喺擴建堆填區前，應先做好減廢措施。
雖然場外示威尚算和平，但當哪吒同班居民入到會議廳公眾席傍聽時，就不時高呼口號請願，最後仲被保安員要求離開添。不過，喺保安員請佢哋離場期間，雙方發生衝突，有居民聲稱被保安員插眼，亦有保安員報稱受傷，並指居民擾亂秩序，最後搞到報警收場。委員會最後因為居民同保安員之間嘅衝突而決定休會，到下星期二會議先至繼續審議有關方案，預料方案屆時會完成表決。
不過，就算「三堆一爐」通過咗工務小組委員會呢一關，「長毛」梁國雄都聲言會喺財務委員會審議「三堆一爐」撥款時「拉布」，睇嚟星星都係請教吓財爺鬍鬚曾應付「拉布」嘅秘訣，為佢口中嘅「一堆三爐」做好準備喇！