政情：中環出更：胞弟爆陳美齡回港執教鞭
移民日本東京多年嘅歌星陳美齡（Agnes）將回歸香江，咪誤會，唔係重返舞台開騷，而係執教鞭。當年風靡萬千少男少女嘅Agnes，唔止唱得，而且仲係史丹福大學教育系博士，早已喺日本當教授，近日佢就獲浸會大學邀請來港當訪問教授，唔知到時會否掀起一番追星熱潮呢？
「靈芝大王」陳宇齡（Abraham）唔止有個星級家姐，太太陳文綺慧仲係東華三院前主席，兩人日前一齊出席東華三院歷屆主席會周年會員大會晚宴。Abraham透露，家姐Agnes本月會回港，先留一日分享教育心得，到九月開學就會正式喺浸大執教鞭。卓妮問Abraham會否擔櫈仔聽家姐教書，佢謙稱未夠班，笑言喜歡遊山玩水多啲，早前佢就相約一班中學同學遊大阪，品嘗一間有三百六十年歷史嘅人氣壽司店。
同樣好學不倦嘅東華三院前主席梁定宇，在中文大學攻讀心理學碩士眨眼已一年，但佢話暫時未決定係咪會投身做心理醫生喎。講番東華三院歷屆主席會，已選出新一屆執行會董，「鐘錶大王」孫秉樞再度冧莊，當選歷屆主席會主席。再次效力東華三院，佢話唔怕冇晒私人時間，笑言自己角色只係從旁協助，唔會干預董事局決定。
孫秉樞攻中價錶
孫秉樞透露，佢將會投放更多時間發展鐘錶生意，主攻中下價鐘錶市場。佢話售價十萬元以上嘅高檔手錶近年銷情一般，中價錶反而好賣得，正同錶廠商洽談，生產三千至五千元一隻嘅手錶，望殺出新局面。
卓妮