衣食住行係現代人生活嘅基本所需，任何一樣出事都係大問題，偏偏港產官僚只識食飯，唔識做嘢，搞到香港民不聊生，衣食住行樣樣愁。嗱，就講住同行吖，港鐵列車事故頻仍，高鐵工程醜聞不絕，已經唔係新聞，而房屋政策嘅甩轆現象，也係從未停過，一樣又瞞又騙，一樣死不認錯，簡直豈有此理。
港府一直揚言未來十年興建二十萬個公屋單位，承諾公屋輪候冊嘅申請人可以三年上樓，講就講得好聽吖，可惜早前被審計署踢爆講大話，未來十年嘅實際公屋供應只有近十八萬個，所謂「三年上樓」更加吹水唔抹嘴，隨時三年變五年甚至更長時間。立法會帳委會尋日討論有關問題，運房局局長張炳良話喎，建屋目標與估算建屋量出現差距係事實，當局會努力覓地，即使三年上樓目標短暫或會偏離，政府仍會努力維持呢個目標不變咁話。簡單講，即係當局承認建屋量未達標，但就唔認自己有錯，你話係咪賴皮吖？
即係咁，港產官僚施政無能，覓地建屋一事無成，公屋興建量遠未達標，根本不足為奇。正所謂，錯就要認，打就企定，當局有錯不認，死瞞爛瞞，家陣畀審計署一嘢踢爆，先至出嚟和盤托出，早知今日，何必當初吖？
更令人火滾嘅係，當局明知公屋興建量遠未達標，但係至今依然攞唔出辦法解決，一味淨係識得吹水，乜嘢繼續努力覓地，乜嘢維持目標不變，冇句實在說話，真係信佢一成，雙目失明。老實講，官老爺畀人連環踢爆講大話，醜態盡露，大家已經見怪不怪，功夫茶只係為市民感嘆，港鐵壞車，列車服務最多延誤一日半日，港府建屋未達標，市民嘅安居夢想一延誤就係數以年計，唔愁就假喇。
所以話，港產官僚呃呃騙騙就叻，要佢哋為市民建房屋，真係仲難過叫港鐵唔再壞車。講開又講，港府房屋政策甩轆，覓地建屋淪為泡影，一早預咗喇，今屆政府上場近兩年，發展新界西北依然只有空中樓閣，填海造地依舊停留吹水階段，見縫插針起樓阻力重重，有邊次唔係報大數吖。當局講就天下無敵，做就無心無力，難怪有議員擔心，一旦政策有變，公屋隨時淪為「二奶仔」。
講到呢度，功夫茶不期然諗起一個廢官，前食衞局局長周一嶽。周一鑊為官八年，胡混度日，渾渾噩噩，結果害到市民生活艱困，生老病死樣樣愁。張炳良原來都唔弱，市民衣食住行之中，佢佔咗兩項，而兩項都搞到怒火處處，民怨載道。
一句講晒，居住及交通係市民生活嘅重中之重，張炳良，咪話功夫茶唔提醒你，如果閣下繼續施政甩轆，錯而不改，被人「炳」到豬頭嗰隻，市民絕對唔會感到「非常驚訝」。