每逢六四、七一等政治敏感時刻，泛民主派人士往返內地都被內地有關執法部門特別「照顧」，好似前民主黨教育界議員張文光曾提過，過往識得一位同已故支聯會主席司徒華同名同姓嘅老師，返親內地過關時都遇阻滯，不過咪以為呢個係泛民「專利」，原來連身為港區人大代表嘅新界社團聯會理事長陳勇（勇哥），近年過關時都易有阻滯。
勇哥話，自從前年年底當選人大後，過關時每三次就會有一次被截查，但係等待十分鐘左右就獲放行，事後不獲告知所謂何事，後來佢心諗，多數因為同名同姓「被認錯」喇！
勇哥都識得唔少「陳勇」，佢話，福建社團聯會就有一位負責青年工作嘅「陳勇」，該「陳勇」早前帶團到福建，友人仲誤以為係佢本人。另外有內地有一位高級軍官也叫做「陳勇」，加上只係一字之差嘅陳勇前、陳勇成等名字，真係多不勝數！