政情：梁美芬開「西九」辦事處
自從○八年開始參選立法會後，立法會議員梁美芬一直打住「西九新動力」旗幟，直到前年佢至加入以工商界為主嘅經民聯。尋日梁美芬喺美孚插旗開議員辦事處，但搵勻成個辦事處，都唔見經民聯標誌，反而西九新動力個標誌就大大個，唔通佢覺得西九新動力個名好聽啲？
原來係選舉策略
其實梁美芬當然唔係忘本啦，咁做原來係精心計算嘅選舉策略。梁美芬解釋話，一向都對經民聯身份好自豪，因為工商及專業背景嘅從政人士，向來好受中產歡迎。但係因為部分西九新動力區議員冇加入經民聯，如果用經民聯個名開辦事處，咁部份西九新動力成員就唔可以運用辦事處資源喇！
梁美芬仲話，唔用經民聯名義其實都有好處，事關辦事處人力物力全部由西九新動力搞掂。既然唔係用公帑，自然無咁多掣肘。話雖如此，但梁美芬係時候諗下辦法喇，唔通到下屆選舉時，佢仍然打着西九新動力旗幟咩？