政情：立會「胡」不歸 怨鐘聲太細
立法會上周三起審議財政預算案撥款申請，有拉布議員不停要求響鐘點算人數，點知點咗七次就流會收場。睇返唔同議員嘅缺席原因，除咗例牌有人話落區同走咗去同持分者開會外，亦有人投訴立法會個鐘太細聲，搞到佢哋聽唔到聲以為已經夠人，唔使落去幫手湊人數。有議員更加投訴立法會大樓有唔少地方會自動隔絕所有鐘聲，如果因為「消失的鐘聲」而搞到佢哋落唔切去開會，秘書處要為流會負上最大責任，真係乜都有得賴。
議員休息室 與世隔絕
綜合各方消息，喺上次接近流會嘅時候，大樓內大約有六十位議員，不過最後會議廳都係唔夠人開會。雖則有唔少建制派議員專登唔去開會，不過亦有人賴個鐘唔夠響。民主黨胡志偉就話，當日佢喺九樓同回收商開緊會，但當個鐘響到大約十分鐘嗰陣，佢突然發現周圍無晒聲，於是佢就心安理得咁繼續留喺上面開會，點知最後就連會都流埋。
民建聯何俊賢當日雖然身處會議廳，但佢透露大樓內並唔係所有地方都聽到鐘聲，例如二樓會議室隔籬有個議員休息室，一閂埋門就會與世隔絕，雖然咁樣令佢覺得非常方便，喺間房入面開會同講電話都唔驚會嘈到人。但由於所有鐘聲去到該房都會離奇消失，嚇到佢唔敢喺入面久留，擔心趕唔切去投票或者湊人數。佢話如果當日有議員身處呢啲「死亡位置」，就好大機會聽唔到鐘聲，變相連累其他準時開會嘅議員。
嚴防流會 各黨誓留守
雖然上次流會並唔係因為大樓內唔夠人，但據聞各黨派嚴防事件重演，決定拉布期間盡量留守喺立法會大樓，費事再度流會畀市民鬧爆。不過，民主黨主席劉慧卿（卿姐）就表明唔怕流會，今晚仲會如期飛去瑞士日內瓦出席聯合國經濟、社會與文化權利委員會舉行嘅研訊。民主黨係上次流會元凶之一，卿姐話已經下令黨友聽日開會時一聽到鐘聲就要嗱嗱臨返會議廳，不過大家都係攞成人身份證，唔可以逼佢哋乖乖地坐喺會議廳乜都唔做，要靠佢哋自律先得。其實議員開會係天經地義，與其花盡心思諗盡藉口，不如認認真真坐喺會議廳好過啦！