中環出更：藍絲帶黃傑龍 被疑撐港台工會
一直催促早日興建新大樓嘅港台員工，尋日趁港台有大型活動，公開派發藍絲帶抗議廣播處處長鄧忍光早前拒絕喺《節目製作人員守則》加入「促進言論自由」等字眼。同場嘅叙福樓集團執行董事黃傑龍可能唔知員工搞緊抗議，佢唔止將工會派發嘅藍絲帶戴上身，仲大讚如果唔係港台員工堅守編採自由，佢都冇機會參與拍攝《窮富翁大作戰III》，唔怪得廣播處處長鄧忍光面燶燶離場。
鄧忍光面燶離開
鄧忍光尋日出席活動時，甫開始致辭就大呻港台苦心規劃興建將軍澳新大樓，卻得唔到立法會支持，希望重新規劃後可以盡快申請撥款。港台早前獅子開大口要求撥款六十億元興建新大樓，後來假減磅呃人，跟住又由商務及經濟發展局突然撤回申請撥款議案，毫無誠意溝通，議員梗係唔會立亂支持喇！
尋日港台員工除咗派藍絲帶之外，亦有員工趁上台攞獎時表達不滿，聲稱港台係屬於全港市民而非港台管理層，明剃鄧忍光眼眉。睇嚟鄧忍光要打好呢份工，都要「好忍得」至得。
卓妮