糖街電單車違泊好猖獗
「日日都有幾架電單車泊喺度，唔講仲以為呢度係泊位！」陳先生不時與兒子到維多利亞公園踢足球，發現糖街入口天橋底長期泊滿電單車，擔心對途人安全構成危險，「好多小朋友會嚟維園踢波，如果啲電單車司機剷上嚟嗰時冇為意，容乜易會出事！」
不足半年發逾二百告票
警方發言人證實，截至四月二十五日，共接獲三十宗有關涉事路段違例停泊投訴，期間共發出二百二十五張定額罰款告票。發言人承諾，將繼續留意有關情況，並採取適當執法行動。
不過，陳先生指情況並未改善，違泊依舊，「唔使半年就出到成兩百幾張告票，證明啲司機已經當正嗰度係免費泊位，警方再唔大力打擊，就會愈泊愈多！」陳促警方加大執法力度，以免情況惡化。