沒有最醜，只有更醜，對於高鐵工程嚴重延誤，港府高官之前好似啱啱瞓醒咁，一味話驚訝同意外，原來佢哋只係詐傻扮懵咋，港府其實一早就知道高鐵工程無辦法如期喺明年通車，為咗推卸責任，竟然同港鐵合演雙簧欺騙市民，簡直豈有此理！
根據港鐵提交立法會嘅文件，舊年十一月港鐵工程團隊鑑於幾份工程合約面對多項艱巨挑戰，高鐵唔能夠趕及二○一五年投入服務，建議先局部通車，但被運房局質疑及反對。換句話講，港府對高鐵延誤唔係一無所知，而係知而不報，咁唔係刻意隱瞞係咩呀！
更令人唔知好嬲定好笑嘅係，運房局委任港大學者李焯芬擔任高鐵工程調查小組主席，點知佢因為擔任高鐵承建商獨立非執董，涉及利益衝突，唯有閃電請辭，令港府出多一次醜。
所以話，怪事年年有，今年特別多。香港大型基建蝸行牛步，大家早就見怪不怪，之但係工程延誤竟然搞出咁多醜聞，就真係聞所未聞喇！
唔怪得有人話，香港時運不濟，真係乜嘢事都會發生。除咗高鐵延誤，港鐵沙中線土瓜灣站遇到古蹟，其中包括宋代古井同瓷器，唔使問工程一定又會延誤嘅喇。港鐵先係堅持當局開咗綠燈可以繼續進行工程，尋日又承認工程因而受阻，但未知可唔可以如期喺一八年完工喎。
嗱，港鐵之前夠拍心口話高鐵可以如期通車啦，結果咪又係唔知拖到幾時，如果話沙中線唔會延誤，細路仔都唔信喇。港府舊年估計沙中線工程要使成八百億元，比最初估算多咗近三倍，最終埋單肯定又唔止呢個數喇。
即係咁，基建工程延誤有好多種原因，沙中線涉及文物古蹟，可以話非戰之罪，因此拖慢進度，相信公眾都會理解嘅。不過咁，高鐵工程延誤，唔止涉及人禍，而且涉及隱瞞，咁就不可原諒喇！
相對於沙中線工程受客觀因素影響而延誤，港鐵虛報高鐵工程進度，隱瞞勘探地質甩漏，咁又點計先？仲有吖，列車監控系統老舊，搞到事故不斷，兩日內跪低六次，全城交通大癱瘓呢？呢啲唔係「人禍」又係乜呀？
正所謂人衰行路打倒褪，列車故障無日無之，重大基建一拖再拖，港鐵可謂頭頭碰着黑。而更加悲哀嘅係，港府居然夾埋港鐵講大話，你話係咪豈有此理吖。古人相信「天人感應」，一個地方沉淪，往往有迹可尋，唔係天降異象，就係怪事不斷，香港七國咁亂，睇怕距離末日都唔遠咯！