近日區議員有唔少變動，尋日憲報公布，除咗我哋早前報道過嘅離島區議員安慶英上月癌症病逝外，觀塘委任區議員、博愛醫院前主席潘兆文亦喺上月二十三日因突發心臟病去世。據理解，法例只係規定民選區議員遇空缺時需要補選，但就冇講明委任區議員遇空缺時，當局係咪需要重新委任新人選。
不過，睇番去年荃灣前委任區議員趙公梃辭職，政府至今都冇搵人接替，加上下屆區議會將全面取消委任議席，難怪政府都話唔會填補潘兆文嘅議席空缺，等委任區議員任期屆滿後變成歷史遺物。
至於區議會補選方面，自從一一年區議會選舉後，足足搞咗七次補選，睇番各有原因，包括三個議員入政府做官，三個議員涉及犯罪被判囚或破產而喪失議席，仲有人因病而未能履行區議員職務。今屆將進行第八次補選，平咗上屆紀錄，但對比○三年嗰屆嘅十一次補選，都仲差三次。