港府成立創新及科技局嘅建議即將喺立法會資訊科技及廣播事務委員會表決，有建制派議員參與嘅「爭取科技局聯盟」就同有泛民主派背景嘅資訊科技界議員莫乃光（Charles），趁尋日立法會舉行公聽會前夕分別召開記者會造勢。其實既然意見一致，點解佢哋唔坐埋一齊開聯合記者會呢？咁唔團結，唔怪之得有人乘機「拉布」啦！
以議員葛珮帆（EQ）同工程界盧偉國（WK）為代表嘅「爭取科技局聯盟」，以及Charles尋日又分別搵嚟廿多位業界人士，先後喺立法會同一房間開記者會，仲發表差唔多嘅意見。據悉，Charles早已安排在下午開記者會，但據聞EQ等人事前收到風，於是搶閘喺上午開記者會截胡。被問到搶閘問題，佢哋就只係各說各話。
至於點解唔一齊開記者會，EQ同WK就話，佢哋有跟唔同黨團溝通，認為多啲議員同社會人士發表正面訊息會好啲喎。Charles亦都話，雖然佢同EQ目標一致，但路線唔同，而佢哋一直都以咁嘅方式爭取成立創新及科技局，認為係個好嘅方法。