政情：遊埠釀流會 經脈亂死撐
立法會周三起就財政預算案撥款審議展開「拉布」戰，開始討論近一千二百項修正案，點知即日下午就宣布流會告終，其中因為經民聯七名議員當中有六人缺席而成為眾矢之的。不過，經民聯主席梁君彥（Andrew）尋日拉大隊「自投羅網」到政府總部遞交政改方案後，就變身「A字膊」一味卸責，反指本身留喺香港，及刻意製造流會嘅議員先係罪魁禍首喎。咁嘅歪理，真係要引用立會主席名言「極端令人遺憾」呀！
「以為大家安排得到」
Andrew尋日拉大隊聯同梁美芬（鼠王芬）、林健鋒（Jeffrey）、張華峰同盧偉國（WK）四名黨友，趕死線遞交政改方案。被問到經民聯成為周三流會嘅幕後黑手，Andrew首先向市民講聲對唔住耍冧，話以為大家會安排得到，唔會流會喎。莫非一句「以為」，佢就認為可以將責任推得一乾二淨？
不過，睇嚟Andrew呢句對唔住都唔多似係真心，皆因佢隨即反口死撐造成流會，任何人都有責任，佢哋缺席係因為唔喺香港，反而本身留喺香港但又缺席，同埋製造流會嘅議員先至應該被譴責喎！咁講法，佢哋留喺香港嘅黨友劉皇發係咪應該都被譴責埋一份呢？
Andrew又直指「拉布」議員既然對政府有咁多訴求，理應把握機會盡量表達意見，而唔係製造流會，狠批行為根本就係罔顧市民福祉嘅政治騷咁話。不過，經民聯七人有六人𢭃住人工咁去外遊，唔肯返港開會，只留低趕得切返港嘅WK為黨友孤軍作戰，條數又點計呢？係咪連做騷都不如呢？
屢爆「鋒」波 醜聞不斷
其實經民聯何止因為黨友「風流快活」搞到流會吖，Jeffrey身兼主席嘅盛事基金近日接連爆出多筆「混帳」，先有龍獅節一役，後再爆基金資助主辦嘅網球精英賽涉利益衝突，睇嚟經民聯真係「經脈亂」，要拉大隊睇睇中醫先得喇！