政情：中環出更：「峰」鴿阻人搵食 罪大惡極
民主黨（白鴿黨）中西區區議員許智峰因抗議區議會撥款二十五萬元畀地區團體推廣《基本法》而出位，但佢玩轉區議會阻礙開會都唔夠，尋日仲阻礙求職者見工。話說佢同一眾黨內區議員到民政事務總署同署長陳甘美華會面，點知會面後，該黨仲霸住個會議室至少半個鐘先肯離開，搞到去總署應徵合約助理資訊科技主任一職嘅應徵者冇會議室面試，要呆坐喺大堂等候，該黨完全係阻人搵食！
霸民政署會議室逾半粒鐘
其實佢哋同陳甘美華只係傾咗一個鐘多啲，但之後就留咗喺會議室逾半個鐘先出來見傳媒，簡直當咗人哋會議室係自己辦公室。今次佢哋會面係要求當局檢討區議會撥款機制、會議常規同議員利益申報機制，但許智峰會後話，當局在會上並冇承諾任何嘢，所以佢哋會畀政府最後通牒，如果當局再唔檢討就會將抗爭行動升級喎。其實許智峰上月初已向民政事務局局長曾德成發過「最後通牒」，唔知呢個通牒要「最後」到幾時呢？
卓妮