政情：中環出更：長毛立會食狗餅
政府尋日就古洞北及粉嶺北新發展區前期地盤平整及基礎設施工程，向立法會財務委員會申請約三億四千萬元撥款，泛民主派議員再施展「拉布」絕技，其中社民連梁國雄（長毛）更即席表演食狗餅，真係夠晒出位。不過，會議開咗四個鐘，最後都未能就撥款申請進行表決，十足鬧劇一場。
長毛之所以食狗餅，事緣係喺之前開內務委員會時，長毛大鬧撥款興建高鐵嘥公帑，又話興建高鐵嘅錢夠工聯會王國興食十八代狗餅。
蔣麗芸專登送贈
黃國健見黨友咁樣被人踩到上面，於是出聲指長毛言語冒犯王國興，但長毛就聲言狗餅係可以畀人食嘅。可能同場嘅議員蔣麗芸（Ann）聽到，於是真係叫司機去買咗盒意大利小麥雞味狗餅送畀長毛食。
到之後嘅財務委員會，長毛收咗阿Ann盒狗餅之後，真係喺會議上開嚟食，而且食完一塊又一塊，有建制派議員都忍唔住影相留念。當時睇到眼都凸埋嘅慢必就攞咗塊狗餅聞咗一聞就即刻放低。又係嘅，狗餅咁重口味，真係唔係人人都啱食，係長毛先至咁激。
混帳議員 垃圾議會
不過，阿Ann就話長毛嫌佢買嗰盒狗餅隻味道麻麻，叫佢下次買過第二款喎。面對財委會呢場鬧劇，保險界議員陳健波都忍唔住叫長毛唔好再拖政府後腿，苦口婆心話︰「做番正常議員啦，唔該你哋！」不過，佢就被長毛鬧番轉頭，仲叫佢返屋企食狗餅同瞓覺。面對咁混帳嘅議員，邊個浪費公帑，相信市民心中有數喇！
卓妮