港府聲稱要將香港打造成「無障礙城市」，講就好聽嘞，但究竟做唔做得到呢？港產官僚一向吹水唔抹嘴，無障礙城市就唔見嘞，搞到傷殘人士障礙重重，隨時「走投無路」，大家就見得多。
話說港鐵九龍灣站有天橋連接牛頭角下邨，係通往屋邨嘅唯一無障礙通道。本來呢，如果設施管理得宜，的確可以造福傷殘人士嘅，可惜有關設施甩甩漏漏，天橋位於港鐵範圍，但橋上嘅輪椅升降台卻非港鐵所有，「冇鎖匙」嘅輪椅人士只能望橋興嘆，得物無所用，你話係咪畀班官僚玩殘吖？
更令人火滾嘅係，關注團體曾要求港鐵購入公用匙，方便冇匙嘅傷殘人士，但係港鐵一句升降台由政府管理，就關人個關。呢，記者視察期間，有使用輪椅嘅長者被迫撐樓梯，再由其他人協助搬動輪椅；亦有唔少老人及家長要搬嬰兒車上落，狼狽不堪。設施有障礙，處處冇關愛，呢幕傷殘人士及長者前無去路嘅辛酸情景，咪就係港府及港鐵無良嘅最佳註腳囉。
話時話，港產官僚一樣咁涼薄。運輸署話喎，曾經考慮將上址部分樓梯改為斜道，惟受地理限制未能興建，所以至用輪椅升降台代替。即係咁，用乜嘢代替都好，最緊要方便市民，否則，有升降台冇鎖匙，咪盞嘥氣！
不近情者多藏奸。有人話，無障礙設施係一座城市嘅文明標誌，計功夫茶話齋，本港無障礙設施天殘地缺，簡直就係港府嘅恥辱標誌。興建升降台嘅目的本來係方便傷殘人士，但係港產官僚為咗方便自己交差，表面上做咗嘢，達到當局建造無障礙通道嘅政策要求，實際上完全幫唔到傷殘人士，咁樣嘅施政都叫「以民為本」？「以官為本」就真。
至於港鐵咯喎，就更加涼薄到冇朋友。冇錯，升降台由政府部門管理，但始終喺港鐵範圍，稍有責任感或者良心嘅都唔會置身事外，對傷殘人士嘅困境熟視無睹喇。講真，叫港鐵改善列車服務，唔好頻頻跪低就話難啫，購備一條升降台鎖匙有幾難呢？港鐵連舉手之勞都唔肯做，寧願睇住傷殘人士孤獨無助，上天無路，入地無門，根本無資格自稱「良心企業」！
小小一個升降台，就睇到港府所謂嘅「無障礙城市」係幾咁笑話。講開又講，無障礙通道變此路不通，大家都見怪不怪咯，最經典一例係食環署用咗四百幾萬元翻新上環兩個殘疾人士公廁，點知兩個廁所四面被石壆同梯級包圍，傷殘人士不得其門而入，唔谷爆至奇喇。
都係嗰句喇，港產官僚無能無德無良心，傷殘人士面對嘅最大障礙，其實就係呢個特衰政府！