政情：公民講場：葉國謙屎橋 累黨友不便

立法會原定前日處理「拉布」議員就《二○一四年撥款條例草案》提出嘅一千一百九十二項修訂，但開會僅僅四個鐘就因為開會法定人數不足而流會，認真羞家。負責協調建制派議員出席會議嘅議員葉國謙就諗咗條屎橋，話建制派已同意議員日後開會時要喺點人數嘅鐘聲響起五分鐘之內返回會議廳，以防再因唔夠人數而流會。其實去年「拉布」時，佢黨友黃定光已發晒火話：「點完（人數）又要點，我去廁所都得啩！」不過，依家又話要五分鐘內返回會議廳，如果去緊廁所嘅話，咁分分鐘連褲都未着好就要衝出廁所？