政情：大律師公會被蹂躪
大律師公會一直被泛民主派視為重要嘅堡壘，發表嘅政見向來都舉足輕重，好似○三年反對訂立《基本法》第二十三條、一一年狠批立法會替補機制等，立場都同泛民陣營相當啱嘴形。不過，大律師公會日前突然同激進泛民大唱反調，公然否定以公民提名普選特首，即時被泛民陣營連環狙擊及質疑，反而建制派陣營就出聲大讚，呢啲完全係輸打贏要，將公會搓圓扁。
公提被否定 何秀蘭發茅
對於公會否定公民提名，工黨何秀蘭火氣最猛，公會方案公布第二日即要求公會再三考慮方案，認為公會唔應該只按字面解釋就斷定公民提名違法，仲明寸公會：「一個專業團體同法律界得到香港人信任，要經過一段好漫長嘅路，但喪失呢種信任可以係好快」。唔啱聽就話會失去港人信任，咁樣輸打贏要，莫非佢當咗公會係政治工具？
「佔領中環」發起人之一嘅戴耀廷作為法律學者，說話都比較有個譜，佢話會尊重公會意見，但都講明一定唔同意公會否定公民提名喎。直到尋日，繼續有泛民人士接力否定公會嘅方案。對於泛民陣營如此狙擊及質疑，難怪公會主席石永泰事先聲明，希望公會提出嘅政改方案唔會被指為「投共、被染紅」，果真有先見之明。
王敏剛選擇性引用建議
不過，建制派對公會否定公民提名簡直如獲至寶，港區全國人大代表王敏剛大讚公會有咁嘅承擔值得讚賞，各界唔應該再跳出圈子研究新方案咁話，彷彿大家坐埋同一條船。但佢就隻字不提公會反對引入愛國愛港等入閘條件，或限制候選人數目，分明選擇性引用公會建議。
無論如何，公會拋出幾項政改意見，實際上係一個套餐，否定公民提名嘅同時，亦一併否決公司票同團體票、引入愛國愛港等條件，但卻反被建制、泛民兩股勢力輪流解讀、各取所需，咁樣被人搓圓扁法，石永泰真係有苦自己知。