中環出更：鐵路風波 二少今時唔同往日
廣深港高鐵香港段超支兼延期風波鬧得滿城風雨，熟悉鐵路運作嘅立法會議員田北辰（田二少）近日化身成「高鐵狙擊手」，多次質疑高鐵涉嫌虛報施工進度，踢爆港鐵一層層嘅掩飾。
曾掌九鐵 裂軌捱批
咁啱十一年前，田二少出任九鐵主席時，被揭發九鐵路軌出現裂痕，當時佢竟話鐵路有裂痕係必然現象，一年有一、兩次好正常，只係唔喺繁忙時間發現，市民先無察覺，呢番說話一出，隨即被各界炮轟。唔知田二少仲記唔記得呢？
話說事隔三日後，田二少要出嚟澄清兼認錯，話自己冇歪曲事實，但講得唔清楚確係「抵鬧」，最終風波先能夠平息。呢場風波，日前就喺某電視畫面上重溫，唔知依家田二少睇番條片有咩感受呢？
卓妮