中環出更：馬豪輝太太非常之旅
早前復活節長假，好多名人都趁機會外遊鬆一鬆，好似港區全國人大代表馬豪輝太太廖千睿（Elaine）就同五個朋友去咗南非旅行。去得南非梗係想體驗當地大自然生態環境，所以佢就去咗位於博茨瓦納（Botswana）嘅喬貝國家公園，近距離接觸野生動物，而出名愛烹飪嘅Elaine仲拜訪當地大廚學煮地道菜，過咗個畢生難忘嘅假期。
今次Elaine去非洲經歷十四天奇幻旅程，觀賞各類野生動物時最為刺激。
獅子埋身勁驚險
講到最驚險嘅場景，就係有日黃昏後拍攝貓頭鷹時，佢突然被導遊拍拍膊頭，細聲叫佢唔好移動，原來遠處有兩隻母獅行緊過來，仲愈行愈近，走到佢身旁。Elaine當時同兩隻母獅只有一道車門之隔，心諗今次惟有聽天由命，幸好最後有驚無險，獅子望兩眼就轉頭離開。
其後佢哋又遇到發嬲嘅非洲象，眼前車頭燈照住嘅非洲象，一見到佢哋就大力拍動耳朵兼高聲鳴叫，同行導遊知道呢個係大象發火前嘅警告，司機於是立即退後車輛並全速離開，帶住眾人脫離險境。不過，佢哋亦有幸見到溫馴嘅瞪羚、長頸鹿和一群群顏色非常絢麗嘅蝴蝶同雀鳥，喺沼澤地區棲息。
學煮牛肉粟米乾
有「政壇師奶廚神」稱號嘅Elaine，一場去到當地，梗係唔會放過學習烹調非洲土著菜式嘅機會啦。當地大廚Samuel Simasiku教佢煮咗個「牛肉粟米乾」，已係非常豐富嘅地道早餐。之後Elaine又教番當地人煮咗個「炒底白汁雞皇飯」，仲教佢哋點樣擺伴碟，互相切磋廚藝。
卓妮