阿婷是一名新入職護士，今日她如常返醫院上班，工作一如平時般繁重，阿婷好不容易才有十分鐘休息時間，但她一坐下時，便覺渾身不舒服。
阿婷：「哎，好痛呀！」
阿婷一聲大叫，嚇壞了也正在休息的護士長阿珊。
阿珊：「阿婷，發生咩事？」
阿珊見阿婷扶着腰骨，痛得快要哭出來。
阿婷：「今朝幫病人下床時，條腰扭咗一下，頭先都冇事，估唔到依家先開始痛。」
阿珊：「唉，你哋啲新紮護士，成日搏命咁做，往往忽略搬移病人時嘅正確方法。」
阿婷：「吓，我淨係知道搬貨物有正確方法，原來搬病人都有要注意嘅地方？」
阿珊：「當然有啦，搬移病人時，姿勢不良好易令身體受傷，例如扭傷、拉傷及腰背損傷。有啲損傷會即時引發痛楚；但某啲情況下，疼痛可能隔一段時間先出現。要正確搬移病人，首先對病人體重及狀態、周圍環境，以及工作人員數量作適當評估，再利用合適方法及設備去搬移病人。我哋醫院啱啱添置咗幾部病人吊機，不過你哋嫌麻煩唔肯用，依家自食其果啦。」
阿婷：「珊姐，我知錯啦。不過喺你繼續溫馨提示我之前，可唔可以簽咗我張病假紙，畀我攞半日假睇醫生先？」
阿珊：「係喎，我唔記得你仲痛緊，快啲去睇醫生啦！」
職業安全健康局
www.oshc.org.hk