大廈平台僭建屋 多年未拆
僭建問題無處不在，屋宇署被轟執法成效不彰！灣仔街坊陳先生不時途經灣仔道，發現有大廈平台有疑似違規搭建屋，「屹立」多時仍未被取締，「咁多年嚟都仲未拆（僭建屋），屋宇署到底係睇唔到定係唔願做？」陳指該搭建屋裝有窗戶及冷氣機，又有大量衣物晾曬，相信有人入住多時，惟部門「懶懶閒唔想做」，令僭建屋一直未被取締。
屋宇署發言人證實上址平台有若干僭建物，已向有關業主發出勸喻信，敦促盡早自行安排清拆有關僭建物，另外，該署將按現行僭建物執法政策，按序向有關業主發出清拆令，清拆有關僭建物。
「咁耐以嚟都冇拆到，屋宇署成日都係得個講字，一啲誠意都冇！」陳先生批評屋宇署態度官僚兼執法力度欠奉，未能有效打擊市區違規僭建，要求檢討及加強執法。