政情：戴罪羅傑承 南華輸波面燶燶
捲入澳門巨貪奇案嘅南華足球隊足主兼商人羅傑承，早前被澳門初級法院裁定行賄及洗黑錢罪成後，遭判囚五年三個月，依家等候上訴。「戴罪之身」嘅羅傑承，被判罪後繼續出席公開活動，除咗入馬場外，仲有去球場睇波。雖然場合唔同，但共通點係佢經常都黑面，莫非「戴罪之身」嘅煩惱係特別多嘅？
提早離場 疑冇眼睇
羅傑承尋日下午約四時，同太太梁芷珊一齊到旺角大球場，觀賞自己隊南華作客對標準流浪嘅本地甲組足球聯賽補賽，賽事進行咗九十分鐘，只見羅傑承睇到面燶燶，最終南華以一比二不敵標準流浪，而羅傑承同太太就喺完場前一分鐘離開看台，莫非係冇眼睇？
不過，講番呢場球賽，原來平時好少賽事喺星期三下午開波嘅，所以羅傑承早前就被質疑係為咗方便佢夜晚入馬場，所以改喺中午作賽。羅傑承就喺社交網站澄清事件，話係標準流浪要求改時間開波，而佢冇馬匹喺尋晚出賽喎。